རྡོ་རྗེ་ལུས་མེད་ཀྱི་སྒྲུབ་ཐབས།
རྡོ་རྗེ་ལུས་མེད་ཀྱི་སྒྲུབ་ཐབས།
རྒྱ་གར་སྐད་དུ། བཛྲཱ་ནཾ་ཀ་སཱ་དྷ་ནཾ།། བོད་སྐད་དུ། རྡོ་རྗེ་ལུས་མེད་ཀྱི་སྒྲུབ་ཐབས། སྔར་བཤད་པའི་ཆོ་གའི་རིམ་པས་སྟོང་པ་ཉིད་བསྒོམས་པའི་རྗེས་ཐོགས་ལ་སྣ་ཚོགས་པདྨ་དང་ཉི་མ་ལ་ས་བོན་གྱི་ཡི་གེ་བཾ་སེར་པོ་ཡོངས་སུ་གྱུར་པ་ལས་རྗེ་བཙུན་འཇམ་དཔལ་རྡོ་རྗེ་ལུས་མེད་དུ་བདག་ཉིད་སྐད་ཅིག་གིས་མངོན་པར་རྫོགས་པར་བྱ་སྟེ། སྐུ་མདོག་སེར་པོ་ཞལ་གསུམ་པ། ཕྱག་དྲུག་པ་རལ་པ་དང་ལྡན་པ། ལོ་བརྒྱད་གཉིས་ཀྱི་ཆད་སྒེག་བག་དང་ལྡན་པ། ཞབས་གཡས་པ་བསྐུམ་པ་སྟེ། གཡས་ཀྱི་ཕྱག་གསུམ་ན་རལ་གྲི་དང་མདའ་དང་མེ་ལོང་བསྣམས་པའོ། །
གཡོན་གྱི་ཕྱག་གསུམ་ན་ནི་ཨུཏྤལ་དང་གཞུ་དང་ཤིང་མྱ་ངན་མེད་བསྣམས་པའོ། །ལྷ་རྫས་ཀྱི་རྒྱན་དང་ན་བཟའ་མཛེས་པར་གྱུར་པ་མི་བསྐྱོད་པ་དབུ་རྒྱན་ལ་གནས་པར་བསྒོམས་ལ། སྨྱོ་བའི་སྦྱོར་བས་བསྒོམ་པར་བྱ་བའོ། །དེ་ལྟར་ཡང་ལྕགས་ཀྱུས་མཁལ་ཁུང་ཕུག་ལ་ཤིང་མྱ་ངན་མེད་ཀྱི་སྙིང་ལ་གཏོལ་བར་བྱའོ། །རལ་གྲིས་ནི་བསྡིགས་པར་བྱ་ཞིང་བསྒྲུབ་བྱ་ལ་མེ་ལོང་གིས་བསྟན་པར་བྱ་བའོ། །དེ་ནས་ཨུཏྤལ་ལས་རྐང་པ་རྣམ་པར་བཅིངས་ལ་སྐྲ་གྲོལ་བ་མྱོས་ཤིང་བསྐམ་པར་གྱུར་པ་དྲང་པར་བྱ་བ་ཡིན་ནོ། །ཨོཾ་ཆེ་གེ་མོ་ཁུག་མཉྫུ་གྷོ་ཥ་ཧྲཱིཿ་ཛཿ་ཞེས་བྱའོ། །རྡོ་རྗེ་ལུས་མེད་ཀྱི་སྒྲུབ་ཐབས་རྫོགས་སོ།།
རྡོ་རྗེ་ལུས་མེད་ཀྱི་སྒྲུབ་ཐབས།